មនុស្សគ្មានសេរីភាពទេ

សត្វ(ក្នុងធម្មជាតិ)អត់ប្រាជ្ញា តែអត់កង្វល់ ហើយមានសេរីភាព ចំណែកមនុស្សមានប្រាជ្ញា មានកង្វល់ តែគ្មានសេរីភាព ព្រោះថា គ្រួសារ សាលារៀន សង្គម ច្បាប់ ទំនៀមទម្លាប់ ប្រពៃណី ការងារឬមុខរបរ…សុទ្ធសឹងជាអ្នកគាបរឹតសេរីភាព ។មិនថាឡើយចំពោះមនុស្សក្រីក្រ អ្នកមានក៏ដូច្នោះដែរ ដោយសារថាមនុស្សកាន់តែមាន គឺកាន់តែមិនសូវទំនេរ ដូចទៅនឹងប្រសាសន៍របស់លោកErich Frommដែលថា៖

Nous avons l’abondance, mais nous n’avons pas la joie de vivre.Nous sommes plus riches,mais nous sommes moins libres.Nous consommons davantage ,mais nous sommes plus vides…Nous avons beaucoup,mais nous sommes peu.ដែលប្រែថា យើងមានភាពសំបូរហូរហៀរ ប៉ុន្តែយើងមិនមានភាពសប្បាយនឹងរស់នៅ។យើងមានកាន់តែច្រើន យើងកាន់តែរវល់។យើងប្រើប្រាស់កាន់តែច្រើន យើងកាន់តែទទេ(កាន់តែខ្វះ)។យើងមានច្រើន តែមិនសូវ•••។

ឃាតកម្មដោយការបាញ់កាំភ្លើងនៅសហរដ្ឋអាមេរិក

ការបាញ់កាំភ្លើងសម្លាប់កូនសិស្ស១៩នាក់និងអ្នកគ្រូ២នាក់នៅសហរដ្ឋអាមេរិកកាលពីម្សិលម្ង៉ៃគ្រាន់តែជាចំណុចតូចមួយប៉ុណ្ណោះ(Pointe de l’iceberg)

ក្មេងចំនួន១៩នាក់និងគ្រូបង្រៀន២នាក់ត្រូវបានបាញ់សម្លាប់កាលពីថ្ងៃអង្គារទី២៤ឧសភា២០២២នៅក្នុងសាលារៀនបឋមសិក្សាមួយក្នុងរដ្ឋTexas។ការបាញ់កាំភ្លើងនេះលើកជាទីពីរក្នុងរយៈពេលទើបតែពីរបីថ្ងៃប៉ុណ្ណោះ បាននាំអោយមានការពិភាក្សាគ្នាអំពីការត្រួតត្រាលើកាំភ្លើងនៅសហរដ្ឋអាមេរិក។ខាងក្រោមនេះជាចំណុចដែលបង្ហាញតួលេខនៃអំពើហិង្សាដោយប្រើកាំភ្លើងគួរអោយរន្ធត់នៅសហរដ្ឋអាមេរិក៖

_មនុស្ស១១១នាក់ត្រូវបានបាញ់សម្លាប់ក្នុងមួយថ្ងៃៗ

ជារៀងរាល់ឆ្នាំនៅសហរដ្ឋអាមេរិកចំនួនមនុស្សជាមធ្យម៤០ ៦២០នាក់ត្រូវបានស្លាប់ដោយសារកាំភ្លើង,យោងតាមអង្គការអាមេរិកមួយឈ្មោះEverytown for Gun Safety។ដូច្នេះគឺក្នុងមួយថ្ងៃៗ មនុស្សចំនួន១១១នាក់ត្រូវបានសម្លាប់នៅសហរដ្ឋអាមេរិក។នៅរដ្ឋTexasដែលទើបមានការបាញ់កាំភ្លើងសម្លាប់មនុស្សកាលពីថ្ងៃអង្គារហើយដែលការលក់អាវុធធូររលុង មានការបាញ់សម្លាប់មនុស្សចំនួន៣៦៤៧នាក់ក្នុងមួយឆ្នាំជាមធ្យម។

_មានការបាញ់កាំភ្លើងចំនួន៣៨៦៥ដងក្នុងរយៈពេល១០ឆ្នាំ

តាំងពីមានការអំពើឃាតកម្មនៅSandy Hookកាលពី១០ឆ្នាំកន្លងទៅ ដែលបានសម្លាប់ក្មេងចំនួន២០នាក់និងមនុស្សពេញវ័យចំនួន៦នាក់មក សហរដ្ឋអាមេរិកបានរាយការណ៍ថាមានការបាញ់កាំភ្លើងសម្លាប់រង្គាលចំនួន៣៨៦៥ដង,នេះបើយោងតាមប័ណ្ណសារGun Violence Archives។

_សិស្សសាលាចំនួន៣១១ ០០០នាក់រងគ្រោះដោយការបាញ់កាំភ្លើង

សារព័ត៌មានWASHINGTON POSTបានរាយការណ៍ថាចាប់តាំងពីមានការបាញ់កាំភ្លើងនៅColumbineក្នុងឆ្នាំ១៩៩៩ដែលបានសម្លាប់មនុស្សចំនួន១៣នាក់មក សិស្សចំនួន៣១១ ០០០នាក់នៃសាលារៀនអាមេរិកចំនួន៣៣១ បានទទួលរងនូវអំពើមួយជាទ្រង់ទ្រាយនៃហិង្សាដោយការប្រើកាំភ្លើង។

ការបាញ់កាំភ្លើងកាលពីថ្ងៃអង្គារ គឺជាលើកទី២៧ហើយដែលបានកើតឡើងក្នុងសាលារៀនរាប់ចាប់តាំងពីដើមឆ្នាំ២០២២នេះ។

_ក្មេងចំនួន៦៤៧នាក់ត្រូវបានបាញ់សម្លាប់តាំងពីដើមឆ្នាំ២០២២នេះមក!

មិនទាន់ដល់ពាក់កណ្ដាលឆ្នាំនេះផង ក្មេងចំនួន៦៤៧នាក់ត្រូវបានខ្មាន់កាំភ្លើងបាញ់សម្លាប់ហើយមនុស្ស១៥៩៤នាក់ត្រូវរងរបួស បើយោងតាមប័ណ្ណសារGun Violence។គិតសរុប មនុស្សចំនួន១៧ ០០០នាក់ហើយដែលត្រូវបានស្លាប់ក្នុងការបាញ់កាំភ្លើងចាប់តាំងពីដើមឆ្នាំនេះមក ។ក្នុងចំណោមអ្នករងគ្រោះទាំងអស់នេះ ក្មេងចំនួន១៤០នាក់មានអាយុក្រោម១១ឆ្នាំ។ក្នុងឆ្នាំ២០២០ ការរងរបួសដោយសារការបាញ់កាំភ្លើងគឺជាបុព្វហេតុទីមួយនៃមរណភាពនៃក្មេងជំទង់ក្នុងប្រទេស។

_កាំភ្លើង១២០ដើមរាល់ជនជាតិជាអាមេរិកចំនួន១០០នាក់

នៅសហរដ្ឋអាមេរិកចំនួនកាំភ្លើងខ្លី និងវែងមានលើសចំនួនជនជាតិអាមេរិក។ក្នុងឆ្នាំ២០១៧ ជនជាតិអាមេរិកទាំងអស់(ជាង៣៣០លាននាក់)មានអាវុធកាន់ចំនួន៣៩៣,៣លានដើមគឺថារាល់ចំនួនកាំភ្លើងចំនួន១២០ដើមត្រូវកាន់ដោយជនជាតិអាមេរិកចំនួន១០០នាក់,នេះបើយោងតាមការស្ទង់មតិរបស់គំរោងSmall Arms។

_៦០ភាគរយនៃឃាតកម្មដោយកាំភ្លើងគឺជាអត្តឃាតកម្ម

…………………………………………………

នៅសហរដ្ឋអាមេរិក មនុស្សអាយុ១៨ឆ្នាំឡើងអាចទិញកាំភ្លើងបានក្នុង៤៤រដ្ឋ។

កូរ៉េខាងត្បូងនឹងធ្វើវិនិយោគទុនរាប់ពាន់លាន$នៅសហរដ្ឋអាមេរិក

ក្រុមហ៊ុនSamSungរបស់កូរ៉េខាងត្បូងនឹងសង់រោងចក្រគ្រឿងអេឡិចត្រូនិចមួយនៅរដ្ឋតិចសាស់ក្នុងតម្លៃ17ពាន់លានដុល្លារហើយក្រុមហ៊ុនHyundaiរបស់កូរ៉េខាងត្បូងដែរនឹងសង់រោងចក្រផលិតរថយន្តអគ្គសនីមួយនៅរដ្ឋចរចាក្នុងតម្លៃជាង10ពាន់លាន$ក្នុងឆ្នាំក្រោយដែលនឹងបង្កើតការងារសម្រាប់មនុស្សចំនួន8100នាក់។ការផលិតរថយន្តនឹងចាប់ផ្ដើមក្នុងឆ្នាំ២០២៥ហើយរថយន្តអគ្គសនីនឹងត្រូវផលិតបានចំនួន300 000គ្រឿងក្នុងមួយឆ្នាំ។

ដោយសារលោកពូ ពូទីន សាំងឡើងថ្លៃសម្បើមណាស់

មុនលោកពូ ពូទីនចាប់ផ្ដើមវាយលុកលុយប្រទេសអុ៊យក្រែន សាំងឡើងថ្លៃសន្សឹមៗទេ លុះដល់ថ្ងៃទី២៤កុម្ភៈ២០២២ពេលដែលលោកពូ ពូទីនបញ្ជាកងទ័ពរបស់ខ្លួនវាយលុកលុយប្រទេសអុ៊យក្រែន សាំងក៏ចាប់ផ្ដើមឡើងថ្ងៃក្រឺតៗគឺចាប់តាំងពីវានៅតម្លៃ1.50$/Lរហូតមក1.65$ 1.70$…1.85$ 1.97$ (កាលពីដើមខែនេះ)ហើយឥឡូវនេះវាឡើងដល់2.15$/Lជាហេតុធ្វើអោយមនុស្សមួយចំនួនធំស្រម៉ៃចង់បានឡានអគ្គសនីតែវាពិបាកទិញព្រោះមិនសូវសំបូរហើយកម្ម៉ង់ត្រូវប្រើពេលពីមួយឆ្នាំឡើងទៅទើបបាន។នៅប្រទេសកាណាដា រថយន្តអគ្គសនីក្នុងមួយឆ្នាំៗលក់មិនបានលើស២០ភាគរយនៃចំនួនឡានលក់ដាច់សរុបឡើយ ខុសពីនៅបណ្ដាប្រទេសនៅទ្វីបអឺរុបជាពិសេសនៅប្រទេសស៊ុយអែដឬណ័រវ៉េ ដែលឡានថ្មីលក់ដាច់មានចំនួនជាង៨០ភាគរយនៃចំនួនឡានលក់ដាច់ទាំងអស់ក្នុងប្រទេស។

និយាយពីទំនិញវិញ កាលមុនថ្ងៃទី២៤កុម្ភៈ២០២២ ក៏វាឡើងថ្លៃដែរគឺឡើងដល់កំរិតដែលយើងមិននឹកស្មានជាពិសេសចំពោះតម្លៃផ្ទះតែម្ដង។បើគិតពីកាល១៥ឆ្នាំមុន ផ្ទះDuplexមួយលក់ក្នុងតម្លៃប្រហែល៣៥០ ០០០$ប៉ុណ្ណោះ មកដល់ឥឡូវអាចលក់បានដល់ទៅ៨០០ ០០០$ ទៅ៩០០ ០០០$។ចំណែកផ្ទះCottageវិញលក់ក្នុងតម្លៃ១៥០ ០០០$ឥឡូវអាចលក់ក្នុងតម្លៃពី៤៥០ ០០០$ ទៅ៧៥០ ០០០$។

ការឡើងថ្លៃរកអ្វីថ្លែងពុំបាននេះធ្វើអោយប្រជាជនមានការត្អូញត្អែរគ្រប់គ្នា ធ្វើអោយរដ្ឋាភិបាលកេបិកសំរេចចិត្តចំណាយប្រាក់3.2ពាន់លានដុល្លារចែកចាយដល់ប្រជាជនគិតក្នុងម្នាក់ៗ(អាយុ១៨ឆ្នាំឡើង)បានចំនួន៥០០ដុល្លារដែរ។ឥឡូវនេះខ្ញុំឮថាគេបំរុងចែកចាយលុយអោយប្រជាជនទៀតហើយក្នុងចំនួនទឹកប្រាក់ប្រហែលៗលើកមុន។

សង្រ្គាមនៅអ៊ុយក្រែនកាន់តែបន្លាយពេល តម្លៃទំនិញនិងសាំងចេះតែកើន ដោយមិនថ្ងៃណាវានឹងឈប់ឡើងទេ។ប៉ុន្តែពេលនេះ ធនាគារបានទប់ស្កាត់ការឡើងតម្លៃផ្ទះហើយដោយដំឡើងប្រាក់ការ ប៉ុន្តែមិនមែនធ្វើអោយតម្លៃផ្ទះចុះទេគឺគ្រាន់តែកុំអោយវាចេះតែឡើងអត់ឈប់ឈរនោះឯង។

គិតទៅសង្រ្គាមដែលលោកពូ ពូទីនថាជាប្រតិបតិ្តការពិសេសនេះ វាបំផ្លាញសេដ្ឋកិច្ចពិភពលោកខ្លាំងណាស់។ខាងរុស្ស៊ី មិនដឹងខូចខាតប៉ុន្មានរយឬពាន់ពាន់លានដុល្លារទេ។ចំណែកខាងអ៊ុយក្រែនវិញក៏មិនដឹងខូចខាតប៉ុន្មានដែរទាំងសម្ភារៈនិងជីវិតមនុស្ស។ប៉ុន្តែប្រទេសអ៊ុយក្រែនត្រូវខូចខាតខ្ទេចខ្ទីច្រើនណាស់ជាពិសេសនៅតាមតំបន់ជាប់ប្រទេសរុស្ស៊ីគឺថាប្រសិនជាត្រូវកសាងទីក្រុងនានាដែលរងការបំផ្លិចបំផ្លាញដោយសង្រ្គាមនេះ វានឹងអាចអស់ថវិកាដល់មួយពាន់ពាន់លានដុល្លារ។ក្រៅពីនេះបស្ចឹមប្រទេសបានចំណាយប្រាក់ជួយប្រទេសអ៊ុយក្រែនអ់សរាប់ពានលានដុល្លារ(អាមេរិកម្នាក់ឯងជា៤ពាន់លានដុល្លារហើយពេលនេះ)។បន្ថែមលើនេះ គេត្រូវទទួលបន្ទុកជនភៀសខ្លួនអ៊ុយក្រែនចំនួនជាង៦លាននាក់ដែលបានភៀសខ្លួនទៅប្រទេសជិតខាងហើយឥឡូវនេះ ប្រទេសហ្វាងឡង់និងប្រទេសស៊ុយអែដបានសុំចូលជាសមាជិកនៃអង្គការអូតង់ ធ្វើអោយប្រទេសរុស្ស៊ីគំរាមវាយប្រទេសទាំងពីរនេះទៀត។ប៉ុន្តែប្រទេសហ្វាងឡង់និងស៊ុយអែដមិនខ្វល់ឡើយនឹងការគំរាមរបស់លោកពូ ពូទីននេះ។

គេបានប៉ាន់ប្រមាណថាប្រេងសាំងនឹងឡើងថ្លៃតទៅទៀត គឺក្នុងរដូវក្ដៅវានឹងឡើងដល់2.30$/Lហើយថានៅចុងឆ្នាំ២០២២នេះ នឹងមានវិបត្តិស្បៀងអាហារពិភពលោកព្រោះថាប្រទេសរុស្ស៊ីនិងអ៊ុយក្រែននឹងមិនបានផលិតស្រូវសាឡីនិងពោតបានដូចមុនពេលសង្រ្គាមទេ ជាពិសេសប្រទេសអ៊ុយក្រែនតែម្ដងដែលមិនអាចដាំដំណាំស្រូវសាឡីនិងពោតបានដោយសារសង្រ្គាម។ប្រទេសរុស្ស៊ីនិងអ៊ុយក្រែនបញ្ចូលគ្នាជាអ្នកផលិតភោគផលស្រូវសាឡីនិងពោតលេខមួយគឺក្នុងមួយឆ្នាំស្រូវសាឡី៣០លានតោន(1/3នៃផលិតផលពិភពលោក) និងពោត៣០លានតោនដែរ(1/4នៃផលិតផលពិភពលោក)។

ប្រទេសកាណាដាជាប្រទេសផលិតស្រូវសាឡីលេខរៀងទី៦លើពិភពលោក។

សត្វមេអំបៅ

នរណាក៏ថាដែរថាជីវិតមនុស្សប្រសើរជាងជីវិតសត្វ។អ្នកខ្លះថែមទាំងបានពោលថាកើតមកជាមនុស្សសំណាងព្រោះជាតិមុនបានសាងអំពើល្អ។បើពិតជាដូច្នោះមែន មិនមានមនុស្សណាម្នាក់កើតមកអភ័ព្វទេក្នុងលោកនេះ!មានស្រ្តីកេបិចក័រម្នាក់ដែលបានឃើញផ្ទាល់គ្រោះថ្នាក់ចរាចរណ៍មួយដែលបានសម្លាប់កូនស្រីម្នាក់របស់គាត់នៅដើមសតវត្សទី២០ហើយបានពោលទាំងរន្ធត់ដូច្នេះថា៖La vie est terrible!ប្រែថាជីវិតគួរអោយខ្លាច!

មិនថាឡើយចំពោះតែមនុស្សក្រខ្សត់ឬជួបនឹងគ្រោះកាចអ្វីមួយ តែសូម្បីចំពោះព្រះពុទ្ធកាលមុនត្រាស់ដឹង មានជីវិតសុខក្សេមក្សាន្តក្នុងវិមានស្កឹមស្កៃដ៏ល្អប្រណិតយ៉ាងណា ម្ដេចឡើយមិនព្រមទទួលយកជីវិតបែបនេះទៅវិញ?នេះក៏ព្រោះព្រះអង្គបានឃើញទេពនិមិ្មត៤គឺមនុស្សចាស់ ឈឺ ស្លាប់និងអ្នកបួស ទើបយល់ច្បាស់អំពីជីវិតសត្វលោកគឺថាLa vie est terrible។តាមពិត ជីវិតមនុស្សនិងសត្វខុសគ្នាដោយបញ្ញា។ដោយសារបញ្ញា ទើបមនុស្សយល់ឃើញច្បាស់អំពីបញ្ហានៃជីវិត ចំណែកសត្វមិនដឹងមិនយល់អំពីជីវិតឡើយ គឺកើតមកត្រឹមតែរស់បានសុខក្ដីទុក្ខក្ដីមិនយល់អ្វីទាំងអស់។តែប្រសិនជាយើងថាកើតមកជាសត្វអភ័ព្វ ប្រហែលជាសត្វដូចជាមេអំបៅនេះមិនព្រមទទួលទេ៖

ជីវិតសត្វមេអំបៅ៖

_មានFreedomពេញលេញពេញទីទៅណាមកណា គ្មានទាស់ទាល់នរណា

ហើយចង់ធ្វើដំណើរទៅជើងមេឃណាមិនបាច់មានPasseport

_ពេលយប់មកដល់ទៅដេកកន្លែងណាក៏បាន មិនចាំបាច់មានផ្ទះសំបែង

_ព្រឹកក្រោកឡើង ហើរចេញទៅរកFree Breakfastមានស្រាប់នៅក្នុងបរិវេណក្បែរៗ

_អ្វីៗជុំវិញមិនជារបស់នរណាឡើយ

_មិនមានជម្ងឺរាប់រយមុខដូចមនុស្សលោកឡើយ

_រស់បានអាយុប៉ុន្មានយកប៉ុណ្ណឹង

_ចំណីអាហារfreeមានស្រាប់គ្រប់កាលៈទេសៈមិនដូចមនុស្សលោកឡើយ

———————

ក្រោយភ្លៀងធ្លាក់មេឃស្រឡះ

អគ្គលេខាធិការអង្គការសហប្រជាជាតិ លោកAntonio Gutierres ក្រោយពីទស្សនាទិដ្ឋភាពខ្ទេចខ្ទីដោយសង្គ្រាមក្នុងប្រទេសអ៊ុយក្រែនមក បានមានប្រសាសន៌ថាក្នុងសតវត្សទី២១ទៅហើយ មិនសមហេតុផលនឹងមានសង្រ្គាមសោះ។លោកមានទឹកមុខតក់ស្លុតចំពោះមហន្តរាយដែលប្រទេសរុស្ស៊ីបានបង្កដល់ប្រទេសអ៊ុយក្រែន។ប៉ុន្តែ នៅលើលោកនេះ អ្វីទាំងអស់មានឡើងសុទ្ធតែមានគូផ្ទុយគ្នាដូចជាស ខ្មៅ ក្ដៅ ត្រជាក់ ខុស ត្រូវ កើត ស្លាប់ ចាស់ ក្មេង ជម្ងឺ សុខភាព តូច ធំ ក្រ មាន អាក្រក់ ល្អ កាច ស្លូត ល្ងង់ ឆ្លាត វែង ខ្លី ជិត ឆ្ងាយ …សង្រ្គាម សន្តិភាព ហើយក្នុងប្រវតិសាស្ត្រពិភពលោក សង្រ្គាមនិងសន្តិភាពតែងតែមានឆ្លាស់ ឬផ្លាស់គ្នាទៅវិញទៅមកជាដរាប។ធាតុផ្ទុយគ្នាទាំងនេះ វាហាក់ដូចជាថ្លឹងថ្លែងគ្នាដើម្បីអោយពិភពលោកមានតុល្យភាពតែប៉ុណ្ណោះ។

ការវាយលុកលើកទី២របស់រុស្ស៊ីលើប្រទេសអ៊ុយក្រែន

ការវាយលុកលើកទី២របស់រុស្ស៊ីក្នុងប្រទេសអ៊ុយក្រែននៅតំបន់ភាគខាងកើតនិងខាងត្បូងនៅពេលនេះមានទ្រង់ទ្រាយធំជាងលើកទី១ ក៏នាំអោយរុស្ស៊ីដណ្ដើមកាន់កាប់តំបន់ជាប់នឹងព្រំប្រទល់ជាមួយប្រទេសរុស្ស៊ីនេះទាំងអស់ ហើយគេកំពុងវាយរុលទៅមុខជាដរាប ប៉ុន្តែមិនសូវលឿនប៉ុន្មានទេ ព្រោះទទួលរងការតទល់ដ៏ខ្លាំងក្លាពីសំណាក់កងទ័ពដ៏អង់អាចក្លាហានរបស់ប្រទេសអ៊ុយក្រែនដែលមានជំនួយដ៏សំបើមពីពួកបស្ចឹមប្រទេស។លោកពូ ពូទីនឃើញដូច្នេះហើយ ក៏គំរាមថាប្រទេសណាមួយហ៊ានលូកដៃក្នុងសង្រ្គាមនេះ នឹងត្រូវរងការឆ្លើយតបលឿនដូចរន្ទះបាញ់ពីប្រទេសរុស្ស៊ី។តែឥឡូវនេះ lលោកនិយាយថាអង្គការអូតង់កំពុងធ្វើសង្គ្រាមជារុស្ស៊ីតាមរយៈការផ្ដល់ជំនួយ។លោកSergei Lavrov,រដ្ឋមន្រ្តីការប្រទេសរុស្ស៊ីបានប្រកាសថាសង្រ្គាមគឺសង្រ្គាមហើយគំរាមថាជំលោះនេះអាចនឹងក្លាយជាសង្រ្គាមលោកលើកទី៣ដែលជាសង្គ្រាមនុយក្លេអ៊ែរ។ម្សិលមិញនេះរុស្ស៊ីបានផ្ដាច់ការបញ្ជូនឧស្ម័នដល់ប្រទេសប៉ូឡូញនិងប្រទេសប៊ុលហ្គារី។ពេលនេះ កំដៅនៃភាពតានតឹងរវាងពួកបស្ចឹមប្រទេសនិងរុស្ស៊ីកាន់តែកើនខ្លាំងហើយ ធ្វើអោយមានការភ័យព្រួយអំពីសង្គ្រាមលោកលើកទី៣ប្រល័យពិភពលោក។

សហរដ្ឋអាមេរិកផ្ដល់ជំនួយច្រើនជាងគេដល់ប្រទេសអ៊ុយក្រែន

សហរដ្ឋ​អាមេរិក​តែ​ម្នាក់​ឯង​បាន​ផ្តល់​ប្រាក់ជំនួយ​ចំនួន ៤ ពាន់​លាន​ដុល្លារ​ដល់​អ៊ុយក្រែនព្រមទាំង​គ្រឿងសម្ភារៈ​សឹក​ដូចជាអាវក្រោះការពារគ្រាប់កាំភ្លើង យន្តហោះដ្រូននិងកាំជ្រួច។ ការដឹកជញ្ជូនចុងក្រោយរបស់ទីក្រុងវ៉ាស៊ីនតោន ដែលមានតម្លៃ 800 លានដុល្លារអាមេរិក រួមមានគ្រាប់កាំភ្លើងត្បាល់ចំនួន144,000គ្រាប់ និងយន្តហោះដ្រូនអត្តឃាតចំនួន 121គ្រឿង ។ លើស​ពី​ជំនួយ​ជា​ច្រើន​ដែល​បាន​ផ្តល់​រួច​ហើយមានដូចជាសម្ភារៈយោធាចំនួន២០០ ០០០គ្រប់ប្រភេទរាប់បញ្ចូលមីស៊ីលបាញ់រថក្រោះចំនួន៤៨០០គ្រាប់ អង់គ្លេស​បាន​សន្យា​ផ្តល់​ជំនួយ​បន្ថែម​ចំនួន ៤១៦ លាន​អឺរ៉ូ និងបន្ទាប់មកនឹងបញ្ជូនមីស៊ីលចំនួន៦០០០គ្រាប់ទៀតទៅអោយអ៊ុយក្រែន។ចាប់តាំងពីខែកុម្ភៈកន្លងទៅ កាណាដាបានផ្តល់ប្រាក់ចំនួន 94 លានដុល្លារ។ ទីក្រុង Ottawa ក៏នឹងបញ្ជូនកាំភ្លើងត្បាល់ធុនM777 ចំនួន 4 គ្រឿង ព្រមទាំងរថពាសដែកផងដែរ។ ចំណែក​ខាង​អឺរ៉ុប បារាំង​បាន​ប្រគល់​សម្ភារៈ​យោធា​ដែល​មាន​តម្លៃ​ជាង​១០០​លាន​អឺរ៉ូ។ ប្រទេសអាឡឺម៉ង់ក៏បានបញ្ជូនឧបករណ៍គ្រប់ប្រភេទរាប់ម៉ឺនគ្រឿងផងដែរ។ ប្រទេសអេស្តូនី និងលីទុយអានី បានផ្តល់ជំនួយច្រើនជាង 427 លានអឺរ៉ូ ចំណែកប្រទេសឡេតូនីបានបង្ហាញថាបានផ្តល់ប្រាក់រាប់សិបលានអឺរ៉ូ ដោយមិនបញ្ជាក់ច្បាស់។ ប្រទេសអ៊ីតាលីវិញបានរក្សាជាសម្ងាត់ចំពោះការដឹកជំនួយផ្ដល់ទៅប្រទេសអ៊ុយក្រែន។ រី ឯប្រទេសជប៉ុនវិញបានបញ្ជូនម៉ាស៊ីនភ្លើង និងយន្តហោះដ្រូនជាច្រើនគ្រឿងផ្ដល់ទៅអោយអ៊ុយក្រែន។

នៅសប្ដាហ៍ក្រោយនេះ អគ្គលេខាធិការនៃអង្គការសហប្រជាជាតិគឺលោកAntonio Guterresនឹងទៅប្រទេសរុស្ស៊ីដើម្បីជួបពិភាក្សាជាមួយលោកពូ ពូទីនរួចហើយពីរថ្ងៃក្រោយមកនឹងជួបជាមួយវ៉ូឡូឌីមៀ ហ្សេឡេនស្គីជាប្រធាធិបតីនៃប្រទេសអ៊ុយក្រែន។

អង្គការអូតង់ថែរក្សាសន្តិភាពក្នុងទ្វីបអឺរ៉ុបទាំងមូល

អង្គការអូតង់ត្រូវបានបង្កើតឡើងដើម្បីប្រឆាំងការឈ្លានពាននិងវាតអំណាចរបស់រុស្ស៊ីប៉ុន្តែវាក៏ជួយអោយបណ្ដាប្រទេសទាំងអស់ក្នុងទ្វីបអឺរ៉ុបរស់ក្នុងសន្តិភាពគឺមិនធ្វើសង្គ្រាមនឹងគ្នាដែរ។

លោកពូ ពូទីនបានជ្រៀតជ្រែកក្នុងនយោបាយនៃបស្ចឹមប្រទេស

ក្រោយពីត្រូវបានដួលរលំហើយរងការអាម៉ាស់មុខដ៏ជូរចត់ក្នុងឆ្នាំ១៩៩១មក រុស្ស៊ីបានសំងំរិៈរកមធ្យោបាយផ្សេងៗដើម្បីពង្រីកអំណាចនិងស្ដារមុខមាត់ឡើងវិញលើឆាកអន្តរជាតិជាពិសេសក្នុងទ្វីបអឺរ៉ុបដែលមានប្រទេសចំនួនប្រមាណ១០ប្រទេសប្រទេសដែលបានឯករាជ្យពីរុស្ស៊ីនិងអតីតប្រទេសរណបនានាឯទៀតដែលនាំគ្នាសុំចុះចូលជាសមាជិកនៃអង្គការអូតង់ដែលបានកើតឡើងក្នុងឆ្នាំ១៩៤៩នោះ ដើមឡើយមានសមាជិកត្រឹមតែ១២ប្រទេសប៉ុណ្ណោះមានជាអាទិគឺកាណាដា សហរដ្ឋអាមេរិក បារាំង អង់គ្លេស អ៊ីតាលី បែលហ្សិក ដាណឺម៉ាក….ឥឡូវមានសមាជិកចំនួន៣៨ប្រទេសជាហេតុធ្វើអោយប្រទេសរុស្ស៊ីកាន់តែឯកោហើយភ័យខ្លាចនឹងការរីកធំឡើងនៃអង្គការអូតង់។សូមជំរាបថាអង្គការអូតង់ត្រូវបានបង្កើតឡើងដើម្បីប្រឆាំងការឈ្លានពាននិងវាតអំណាចរបស់រុស្ស៊ីប៉ុន្តែវាក៏ជួយអោយបណ្ដាប្រទេសទាំងអស់ក្នុងទ្វីបអឺរ៉ុបរស់ក្នុងសន្តិភាពគឺមិនធ្វើសង្គ្រាមនឹងគ្នាដែរ។ហេតុដូច្នេះហើយប្រទេសរុស្ស៊ីមិននៅស្ងៀមក៏ខំប្រជែងអំណាចឡើងវិញលុះដល់ពេលលោកពូ ពូទីនបានឡើងកាន់អំណាចក៏បង្ហាញពិភពលោកអោយឃើញច្បាស់នូវការជ្រៀតជ្រែកក្នុងនយោបាយនៃបស្ចឹមប្រទេសកាន់តែច្រើនឡើង។

រុស្ស៊ីបានប្រឹងប្រែងបង្វែងលទ្ធផលបោះឆ្នោតក្នុងប្រទេសនានានៅអឺរ៉ុបចំនួន២០ប្រទេសចាប់តំាងពីលោកពូ ពូទីនបានឡើងកាន់អំណាចក្នុងឆ្នាំ១៩៩៩មកដើម្បីធ្វើអោយបស្ចឹមប្រទេសចុះកម្លាំងខ្សោយ។មុនឆ្នាំ២០១៥ រុស្ស៊ីជ្រៀតជ្រែកតែក្នុងប្រទេសរណបនានានៃអតីតសហភាពសូវៀតប៉ុណ្ណោះបន្ទាប់មកក៏ជ្រៀតជ្រែកចូលក្នុងបស្ចឹមប្រទេសទាំងមូលតែម្ដង។រុស្ស៊ីប្រើល្បិចកលផ្សេងៗដូចជា៖

_ធ្វើយុទ្ធនាការបំផ្លើសព័ត៍មាន

_លួចព័ត៍មាននិងផ្ដល់ប្រាក់លាក់កំបាំងដល់បក្សនយោបាយស្ដាំនិយមជ្រុល

_ផុសអីមែលនិងឯកសារក្លែងក្លាយលើWikiLeaks

_រៀបចំបាតុកម្មប្រឆាំងជនភៀសខ្លួន

_វាយប្រហារតាមប្រព័ន្ធអ៊ីនធើណេតលើការចុះឈ្មោះក្នុងបញ្ជីបោះឆ្នោត

_លួចការរាប់សន្លឹកឆ្នោត

ខាងក្រោមនេះជាឧទាហរណ៍ជាក់ស្ដែងខ្លះៗដែលរុស្ស៊ីបានប្រព្រឹត្តចំពោះប្រទេសមួយចំនួនក្នុងទ្វីបអឺរ៉ុប៖

_ក្នុងឆ្នាំ២០០២,២០០៤,២០១០និង២០១៤ ប្រទេសអ៊ុយក្រែនត្រូវបានរុស្ស៊ីវាយប្រហារតាមប្រព័ន្ធអ៊ីនធើណេតក្នុងបំណងកែប្រែចំនួនសន្លឹកឆ្នោតសរុប,បង្វែរចិត្តគំនិតអ្នកបំរើក្នុងគណៈកម្មការបោះឆ្នោតនិងថែមទាំងប្រកាសជ័យជំនៈក្លែងបន្លំរបស់បេក្ខជនរបស់បក្សស្ដាំនិយមជ្រុល។

_ ប្រទេសប៊ុលហ្គារី ក្នុងឆ្នាំ២០១៦

_ប្រទេសម៉ុលដាវី ក្នុងឆ្នាំ២០០៥,២០០៩និង២០១៤

_ប្រទេសសាធារណរដ្ឋឆេកូក្នុងឆ្នាំ២០១៧និង២០១៨

_ប្រទេសម៉ាសេឌ័នខាងជើងក្នុងឆ្នាំ២០១៨

_ប្រទេសប៊ីយេរុស្ស៊ីក្នុងឆ្នាំ២០០៦

_ម៉ុងតេណេហ្គ្រូក្នុងឆ្នាំ២០១៦ចារជនរុស្ស៊ីជាមួយជនរួមគំនិតផ្សេងទៀតត្រូវបានទទួលកំហុសថាចង់ធ្វើឃាដកម្មលនាយករដ្ឋមន្រ្តីMilo Dukanovicនៅថ្ងៃបោះឆ្នោតដើម្បីលើកបន្តុបមេដឹកនាំដែលគាំទ្រដោយរុស្ស៊ីហើយដែលប្រឆាំងអង្គការអូតង់។ប៉ូលីសនៃប្រទេសនេះត្រូវបានចារជនបស្ចឹមប្រទេសបានរាយការណ៌ប្រាប់ហើយក៏បានជួយសង្រ្គោះលោកDukanovicទៅ។ក្នុងឆ្នាំ២០១៨រុស្ស៊ីបានមកអុកឡុករំខានការបោះឆ្នោតក្នុងប្រទេសនេះទៀត។

_ប្រទេសអាល្លឺម៉ងក្នុងឆ្នាំ២០១៥ហើយក្នុងឆ្នាំ២០១៧ គណៈបក្សស្ដាំនិយមជ្រុលAfDបានទទួលអាសនៈចូលមកក្នុងសភាតំណាងរាស្រ្តអាល្លឺម៉ងក៏ធ្វើអោយបក្សចំរុះភាគីដឹកនាំដោយAngela Merkelចុះខ្សោយ។មិនត្រឹមតែបានធ្វើយុទ្ធនាការបំភាន់ព័ត៌មានក្នុងបណ្ដាញសង្គមប៉ុណ្ណោះទេ រុស្ស៊ីក៏ត្រូវបានគេចោទប្រកាន់ថាបានវាយប្រហារនិងធ្វើចារកម្មតាមប្រព័ន្ធអ៊ីនធើណេតលើប្រទេសអាល្លឺម៉ងទៀត។អ្នកតំណាងរាស្ត្រអាល្លឺម៉ងម្នាក់ក៏បាននិយាយថាAfDគឺជាដៃវែងរបស់លោកពូ ពូទីនលូកលុយចូលក្នុងសភាតំណាងរាស្រ្តអាល្លឺម៉ង។

_ប្រទសហូឡង់ក្នុងឆ្នាំ២០១៦និង២០១៧

_ប្រទេសអូទ្រីសក្នុងឆ្នាំ២០១៦

_ប្រទេសម៉ាល់ក្នុងឆ្នាំ២០១៧

_ប្រទេសអេស្ប៉ាញក្នុងឆ្នាំ២០១៧

_ប្រទេសអង់គ្លេសក្នុងឆ្នាំ២០១៥ហើយក្នុងឆ្នាំ២០១៦ពេលធ្វើប្រជាមតិលើBrexit,គណៈបក្សនយោបាយធំៗយល់ព្រមអោយប្រទេសអង់គ្លេសស្ថិតនៅក្នុងសហភាពអឺរ៉ុបហើយខុសពីការរំពឹងទុក អង្គការតូចៗដែលគាំទ្រការចាកចេញក៏បានឈ្នះការភ្នាល់របស់ខ្លួន។អង្គការតូចៗទាំងនេះទទួលការទ្រទ្រង់ពីយុទ្ធនាការបំភាន់ព័ត៍មានលើបណ្ដាញសង្គមដែលរ៉ូបូនិងម្រេញគង្វាលរុស្ស៊ី(Robots et Trolls Russes)ព្រមទាំងប៉ុស្តិ៍ទូរទស្សន៍RTនិងទីភ្នាក់ងារព័ត៌មានSputnikរុស្ស៊ីជាអ្នកចាត់ចែង។

_ប្រទេសកាណាដាក្នុងឆ្នាំ២០១៥៖រដ្ឋភិបាលសហព័ន្ធបានប៉ាន់ប្រមាណថាការបោះឆ្នោតដែលលោកJustin Trudeauឈ្នះនោះទទួលរងការប៉ុនប៉ងយារយីតាមបណ្ដាញអ៊ីនធើណេតតិចតួចទេ។អ្នកស្រាវជ្រាវម្នាក់បានធ្វើការវិភាគលើការផុសចំនួន១២លានTweetsហើយរកឃើញថាម្រេញគង្វាលរុស្ស៊ីបានគាំទ្រគណបក្សអភិរក្សនិយមរបស់លោកStephen Harperហើយម្រេញគង្វាលអ៊ីរ៉ង់គាំទ្រគណបក្សសេរីនិយម។ដូចម្ដេចក្ដី គេពុំអាចដឹងថាវាហុចលទ្ធផលអោយជាយ៉ាងណាទេ ប៉ុន្តែគោលដៅរបស់វាគឺមកបំបែកបំបាក់មនុស្សក្នុងសង្គមនៃប្រទេសកាណាដា។

_ប្រទេសបារាំងក្នុងឆ្នាំ២០១៧៖ធនាគាររុស្ស៊ីបានអោយប្រាក់ខ្ចីរាប់លានដុល្លារដល់គណបក្សរណៈសិរ្សជាតិរបស់លោកស្រីMarine Le Pen។គណបក្សរណៈសិរ្សជាតិ(Front national)នេះបានមានទំនាក់ទំនងជាមួយមន្ត្រីរដ្ឋាភិបាលរុស្ស៊ីតាំងពីឆ្នាំ២០១១ម្ល៉េះ។ក្នុងឆ្នាំ២០១៧ពេលមានការបោះឆ្នោតជ្រើសរើសប្រធានាធិបតី គណបក្សEn Marcheរបស់Emmanuel Macronត្រូវបានចោរលួចព័ត៌មានតាមបណ្ដាញអ៊ីនធើណេតហើយអ៊ីមែលក៏ត្រូវបានផុសឡើងដោយWikileaks។ម្រេញគង្វាលនិងរ៉ូបូរុស្ស៊ីបានធ្វើយុទ្ធនាការបំភាន់ព័ត៌មានដ៏ធំមួយទោះបីហ្វេសប៊ុកបានជួយធ្វើអន្តរគមន៍ដោយបានលុបចោលគណនេយ្យក្លែងក្លាយចេញទៅក្ដី។លោកស្រីLe Penបានចាញ់ការបោះឆ្នោតក្នុងជុំទី២ប៉ុន្តែមិនដែលបានទទួលការគាំទ្រច្រើនដូចនេះឡើយ។

_ប្រទេសអ៊ីតាលីក្នុងឆ្នាំ២០១៦៖ការធ្វើប្រជាមតិរដ្ឋធម្មនុញ្ញបានធ្វើអោយលោកនាយករដ្ឋមន្រ្តីMatteo Renziលាលែងពីមុខដំណែង។កំណែទំរង់ដែលគេបាក់ដាក់ស្នើត្រូវបានគណបក្សស្ដាំនិយមនិងស្ដាំជ្រុលនិយមដូចជាMovimento 5Stelle និងLega Nordដែលមានប្រជាប្រិយភាពហើយនោះ ស្រែកប្រឆាំង។គណបក្សទាំងនេះមានទំនាក់ទំនងជាមួយប្រទេសរុស្ស៊ី។Movimento5 Stelleធ្លាប់បានជួបជុំជាមួយមន្ត្រីផ្លូវការនៃគណបក្សRussie Unieដែលគាំទ្រដោយលោកពូ ពូទីន។ចំណែកគណបក្សLega Nordវិញបានទទួលជំនួយប្រាក់ឧបត្ថម្ភពីប្រទេសរុស្ស៊ី។យុទ្ធនាការបំភាន់ព័ត៌មានក៏ត្រូវបានរុស្ស៊ីបង្ហោះផ្សាយឡើងដែរ។ក្នុងឆ្នាំ២០១៨រុស្ស៊ីក៏បានជ្រៀតជ្រែកនយោបាយនៃប្រទេសអ៊ីតាលីម្ដងទៀត។

_ប្រទេសអាមេរិកក្នុងឆ្នាំ២០១៦៖អ្នកស្រាវជ្រាវបានយល់ឃើញថាការបោះឆ្នោតប្រធានាធិតីក្នុងឆ្នាំ២០១៦បានបង្ហាញអោយឃើញច្បាស់ពីភាពជោគជ័យខ្លាំងបំផុតនៃដំណើរការប៉ុនប៉ងរបស់រុស្ស៊ី។ម្រេញគង្វាលនិងរ៉ូបូរុស្ស៊ី(Trolls et Robots Russes)បានតភា្ជប់ជាមួយអ្នកលេងហ្វេសប៊ុកចំនួន១២៦លាននាក់ដើម្បីបំបែកបំបាក់សង្គមអាមេរិកកាំង។វាប៉ុនប៉ងបំបែកខ្ញែកសន្លឹកឆ្នោតរបស់អ្នកវឌ្ឍននិយមនិងអ្នកប្រជាធិបតេយ្យនិយមហើយវាបានញុះញង់ពួកអាមេរិកកាំងដើមកំណើតអាព្រិកកុំអោយទៅបោះឆ្នោត, វាបានលួចអ៊ីមែលនៃយុទ្ធនាការរបស់លោកស្រី Hillary Clintonហើយវាបានវាយប្រហារប្រព័ន្ធបោះឆ្នោតតាមឃុំសង្កាត់ទៀត។